Honcewang

Di dinya palebah dinya
lebah susukan jalan nu taringgul ku batu
ngeclakna cai nyascas bodas
dina lamping semu kayas
taneuh beureum liliwatan
jadi saksi sore tadi
Di dinya palebah dinya
lebah logakna jalan ngeyembeng cai ki hujan
becek nyuuh da puguh kiruh
cileuncang semet mumuncang
tapak keur hujan
leumpang laun semu alum...karasa ku ati-ati
da puguh inggis teu nepi
Di dinya palebah dinya
anjlogna ka hiji lembur....
lembur pamatuhan batur
pasir luhur ebreh katenjo
bruk-brak lega ku pasawahan
mangsa tatanen keur ngemploh hejo
matak hook nu nempo
Di dinya...
enya palebah dinya
di tempat linduh tur iuh sumebar aya malati
malati keur mangsa ligar
ngahunjar malah teu usik
bongan alum..
nyerang kanu rek balik.